山洪暴發

今日山洪暴發,事源爺爺抱住我,我一連放左好多個屁,咁爺爺就好八卦咁睇下我條片有冇料到,真係有野,不過就得好少,咁爺爺就高聲呼叫,想搵人幫手喇.
喺房執緊野嘅媽媽聽到,就出黎做善後工作喇,佢打開我條片,見我好少料,於是佢就膽粗粗,唔用尿墊啦,佢好快手咁幫我清潔之際,佢都心知不妙喇,見到有d野出緊黎,佢想以最快速度,喺我pat pat下墊好尿片,希望可以將損失減至最低,不幸地山洪已經暴發,向前直噴,可幸的是直噴 High Chair,而唔係媽媽面上,如果唔係媽媽今晚有狼狼牌熱mask用喇. 呢個時候,媽媽知道自己唔可以亂,應該盡快幫我清潔同換杉先,其他野唔好理住,好彩爸爸及時番到,可以做善後工作.

第一個聖誕節

今日係我狼仔第一次過聖誕節,爸爸媽媽帶左我去新都城感受一下熱鬧氣氛.


後面係一棵好大好大嘅樹,抱住我就係第一次喺我個BLOG出現嘅媽媽

之後又係去屋企樓下個公園玩下

去健康院打針

今日我狼狼仔又要番健康院打針喇,打嗰陣都係叫左一聲,之但係番到屋企,夜晚趁爺爺嫲嫲出去散步我就瘋狂叫喊,好勁呀..媽媽爸爸未見過我咁勁架,我真係好夠中氣架...嗱,唔好激嬲我喇. 今次磅重有7.6kg,比75線多少少啦...唔太肥(有d啦),唔瘦,黃金比例啦..

四個月喇

我四個月大喇..大個仔好多喇,已經著中碼尿片一個星期有多. 今日公公婆婆同miu miu姐姐黎探我,真係好喇. 而家我狼仔會認人,如果我唔係成日見你的話,你一抱我,我就會打量你一番,如果你d皮膚唔好嘅話,就會俾我一眼睇出. 我而家好硬淨喇,公公都夠膽抱我,真真開心,因為d大人可以同我玩"飛飛"同"企喺度". 唔該多d大人黎探我, 謝謝!

遊戲時間

每日爸爸媽媽放工返到屋企,就會係我狼狼仔嘅遊戲時間. 呢幾日,爸爸媽媽同我玩一個新遊戲,就係放我上張被度,跟住佢地就成為一張人肉吊床,張我蕩來蕩去. 我狼狼仔非常鍾意,一玩呢個遊戲,喊緊都會停止,好enjoy!


就係呢張被

到婆婆家

今日我地一家三口遠赴位於佐敦嘅公公婆婆家,嘩..要搭好耐車架. 我狼仔一直都悶悶不樂,仲喺地鐵度喊添...真真失禮.
第一次去到婆婆屋企,我初初都好乖,同公公婆婆有講有笑,但之後爸爸媽媽落左街食飯,我就覺得不是味兒喇,好彩爸爸媽媽都醒目,好快食完番黎,爸爸餵我食奶我先至平靜d咋.
之後爸爸媽媽唔敢帶我周圍去,嗱嗱聲返屋企喇.

喜歡和爸爸一起

媽媽瘦d先會有相睇

扁嘴樣

開始想喊的模樣

三日唔開, 一開不得了

我狼狼仔之前三日冇便便,今日夜晚終於有喇! 喺爸爸抱住我睇佢細個d相嘅時候,我就成功左,但唔知係唔係一次出左三日嘅野,所以特別多,漏左好多出黎,換片片嘅時候我隻腳同手都無一幸免,我仲叻到食手手..yummy!!
我就要即刻沖涼,爺爺倒d水唔係好夠熱,爸爸於是手快快咁幫我沖,驚我會冷親,可能因為唔夠熱,所以我唔係好似平時咁enjoy喇.

呢條褲同口水肩係媽媽上網買俾我架, 褲$32, 口水肩$50有五條唔同款,今次呢條褲好唔好彩,成為不潔之褲

條褲後面係咁嘅,其實呢個size係人地成歲幾著,不過媽媽孤寒,諗住出年都仲著得

第一次食餅

星期一媽媽喺公司展銷會度買左一包俾BB仔食嘅餅俾我,今日媽媽番到屋企,爺爺已經急不及待同媽媽報告我狼仔為食嘅情況. 係咁嘅,嫲嫲想俾少少我試下,咁原來我好鍾意食,好快咁食完,仲要唔夠發脾氣,於是嫲嫲就俾埋另外一塊俾我食. 原本諗住一日食一塊,另外一塊用密實袋裝好嘅,而家可以慳番一個密實袋喇. 希望媽媽會再買多D好野俾我狼狼仔食啦,多謝!

扮女仔

扮荷蘭人

扮花女

有幾個姐姐到訪

今日黎左幾個姐姐(Betty, Charmaine, Tina),佢地係爸爸媽媽嘅舊同學. 其中一個唔係舊同學,係一個慕我狼狼仔而來嘅助產仕姐姐. 佢地又抱我,又同我傾偈,我都幾好人,用我煞食嘅笑容同屁黎回應. 不過到最後都係忍無可忍要扭計,最後由爸爸攪掂左我.
媽媽好開心,因為佢好耐冇見d舊朋友,而且佢地讚媽媽整嘅芝士蛋糕好味,攪到媽媽飄飄然!

番食夜奶

我狼仔今日勁肚餓,凌晨三點同朝早七點都要食奶奶...攪到爺爺嫲嫲散晒!

美好的時光

狼仔,

你現在快要三個半月大了,媽媽真的很感謝你為我帶來前所未有的滿足感和成就感. 滿足感是你由一個未看見心跳的胎囊,之後在媽媽肚中動來動去,到現在早上起來懂得笑我小嬰孩. 成就感就是你活潑可愛,身體健康. 你總是成為家庭中的焦點,為我們帶來歡樂.
你的媽媽,不是一個能幹的人,沒有野心,沒有事業心. 從前下班回家,沒有特別事做(飯也是你爸爸做),現在有了你生活變得充實,人生好像也有了目標. 別人常說養一個小孩是負擔,但我卻十分享受有小孩的時光,不論你長大後會成為一個怎樣我人,你也曾經帶給媽媽快樂,這已是難得.
但願你身體健康,如你長大之後也疼愛爸媽的話,我們便是得到最大的回報了.
最後還要一提,帶小孩的確是一件辛苦的事,幸運地你嫲嫲和爺爺願意帶你,媽媽才可把一件累極的事變成樂極的事.

媽媽

PH姨姨到訪

今日媽媽個舊同事黎左我屋企探我地,仲帶埋Liam同Christina黎. PH姨姨見到我即刻要抱我,姨姨送左禮物俾我,仲有利是添, 多謝你呀. 而Liam同Christina就掛住睇 Baby Channel,佢地講野好古怪,我狼狼仔完全唔知佢地講d乜,連媽媽都轉左channel,都唔知係唔係講我狼狼仔壞話呢??

長征九龍灣

今日爸爸媽媽同我狼狼仔去九龍灣食LUNCH同行街街呀...我未試過去咁遠嘅地方架...朝早八點半起身食左奶奶之後, 媽媽就為我準備奶粉呀, 熱水呀, 尿片呀咁, 十點半就可以出發喇. 未出門口之前, 我已經唔耐煩, 大大聲咁喊喇, 媽媽於是就連頭髮都唔疏, 零點九秒九就推我落樓等爸爸喇. 一出到門口, 我就瞓著左, 一醒呢, 就見到爸爸媽媽食緊野喇. 我都好乖喇, 瞓下醒下咁, 到左要食奶奶都冇喊, 爸爸媽媽食完飯之後, 爸爸就出左去露天地方餵我開餐喇.
跟住我地去左宜家傢俬行下, 可能係佢地睇野太耐, 而佢地又唔係好理我, 再加上我狼仔份人比較冇耐性, 咁我就扭計, 要爸爸抱抱. 佢地都唔係好夠時間睇野喇, 因為仲有半個鐘我又要食奶奶喇..
就係咁我地又要番屋企喇...我狼仔係唔鍾意成日悶喺屋企, 不過你地D大人出街都要多D理下人同抱下人先得架...

在月台上

德福廣場

我三個月大喇

今日係十一月十五日,我狼狼仔黎到地球已經三個月喇. 我覺得呢個叫做地球嘅地方好有趣, 我以前喺媽媽個肚度就比較悶.

星期一至五:
十一點幾食完奶奶之後, 我會同爺爺嫲嫲去彩明酒樓歎茶, 嗰度d電視待別好睇, 仲有d水晶燈好靚好靚. 而家我都係留喺車車上面, 好想好似d哥哥姐姐咁坐喺bb椅上面呢.
飲完茶之後爺爺嫲嫲會同我去公園, 我好鍾意向上望, 因為覺得d高根樓大廈好宏偉. 之後就番屋企開餐.
跟住喺屋企都係玩下瞓下咁, 到左七點, 爸爸媽媽番到屋企又會同我玩, 玩玩下我就會扭眼瞓, 晚晚如是, 所以爸爸媽媽每日番到屋企都係見到一個忟薑狼仔居多. 再食下奶咁, 一日就過左喇.

星期六至日:
如果爸爸星期六要番工, 我朝早都會同爺爺嫲嫲去彩明酒樓歎茶, 如果唔駛, 爸爸媽媽會帶我出去食lunch, 唔係大快活就係一粥麵, d大人悶唔悶架, 食黎食去都係呢d快餐..之後我地又會去公園, 爸爸會抱住我周圍行, 話俾我知呢樣係d乜嗰樣係d乜咁, 好好玩架. 之後又係番屋企玩下瞓下咁, 又食下奶咁, 星期六日咁又過左喇.

如是者, 就過左我狼仔人生頭三個月喇.

我最遠都係去到觀塘(聯合醫院),希望快d可以去遠d嘅地方啦, 開始我狼狼仔嘅歷險旅程!

嫲嫲同媽媽生日

今日係嫲嫲同媽媽生日,我第一次見到生日蛋糕,不過我冇得食呀!

多謝秋阿姨

今日媽媽自己走左落街一陣, 番黎就多左一袋靚靚杉仔喇...嘩d杉仔好cutie架, 多謝你呀, 秋阿姨!

著左粉紅色,似唔似女仔??


著左呢件夾衣,我唔可以伸直雙腳,媽媽話因為我個身比較長,要著d 6-12個月嘅size

我就係鍾意出街

我狼狼仔唔係好鍾意成日留喺屋企，每日都要出下街，如果唔係我就會大聲喊，你地大人一係就要抱住我，唔係就唔駛旨意我會乖乖．

大人, 唔帶我出街嘅話, 小心拳頭冇眼呀!(設計對白)

美男子

媽媽話我好靚仔, 你話係唔係??

過頭笠, 兩件頭

我狼狼仔而家硬淨左, 可以著過頭笠.


嫲嫲購自九龍城出口店, 盛惠三十蚊一套.

我有一個好爸爸

我爸爸對我好好架, 餵奶換片就一定啦, 仲好鍾意同我洗白白添...

睇我幾開心

寒流襲港

今日最低氣溫16度, 我狼仔都換上冬裝.

食手仔

近來我狼狼仔唔只食奶奶, 仲愛上食自己隻手仔, 好好味, 你要唔要試下?? 媽媽話我識食手仔係叻嘅表現!!

表現良好

個個都話我狼狼仔愈大愈乖, 我近來唔會無啦啦發脾氣, 又識笑, 多數都係便便,眼瞓同肚仔餓先扭計. 最叻就係自己無端端端戒夜奶, 我夜晚十一點幾食完, 第二日朝早7點先叫食, 個個話我孝順喎...


好開心呀



乖乖坐喺車車上面, 等爺爺嫲嫲歎茶

又係趴趴遊戲

今日自己趴係床度, 玩左幾次, 我狼仔趴喺度係唔會喊, 係唔係好叻呢??

學趴低身

今日爸爸媽媽想訓練我狼狼仔嘅頸部肌肉, 所以就同我玩趴趴遊戲喇..首先, 爸爸打直抱住我, 之後慢慢咁瞓落床度, 就係咁我就趴左喺佢身上面, 唔知點解, 我就覺得好眼瞓喇..


好舒服呀

點解隻手同隻腳咁凍架

今日我狼狼仔正在熟睡中, 忽然間覺得隻手仔腳仔好凍, 我就瘋狂掙扎, 醒左之後就見到呢兩舊東東喇....咩事呀???


原來係我爸爸同媽媽幫人整手仔腳仔石膏像, 得唔得意呀??


呢個玩具係爸爸買俾我架

官姐姐到訪

今日媽媽個舊同事官姐姐黎我屋企探我, 仲送左套靚冬天杉俾我, 好開心呀. 媽媽仲未買冬天杉俾我, 所以佢覺得好實用, 而我都表現良好, 全程冇喊. 多謝官姐姐, 下次再黎丫!

我的怪怪樣

你是如此奇妙

狼仔,

媽媽從前從未想過我能夠當上一個母親, 總是懼怕懷孕及生產過程的辛苦, 但突然有一天女人天生的母性發作起來, 在你爸爸不太積極之下決定要小孩, 即是後來的你.
懷孕過程對我來說絕對不是一件輕易的事, 每天腹大便便的上班下班, 真是辛苦, 體力真是用盡了.
然而上天真是對我不薄, 最终還是安全地把你帶來這個花花世界.
你一天一天的成長, 由一個瘦小嬰兒(3.67KG), 到今天已有十三磅重了.
每當你坐在嬰兒車上, 你便會把雙眼睜得又大又圓, 左顧右盼, 我便會很心喜, 因為你的樣子真是太可愛了.
但當你肚子痛的時候, 你便會面容扭曲, 瘋狂大哭, 我便會慌張起來, 心痛得很.
生命真是神奇, 還記得照超聲波時, 你只是一個細胞, 現在已是一個可愛小孩.
狼仔, 媽媽只希望你健康快樂, 將來會送一個弟妹給你!
















很可愛呢





媽媽

今日我兩個月喇, 但媽媽要返工呀

今日係我狼狼仔兩個月大嘅大日子..時間真係過得好快呢..

自從我滿左月之後, 日日都會落樓行下, 爺爺嫲嫲仲成日都帶我去飲茶添, 我最鍾意酒樓d水晶燈架喇, 好靚架! 以前喺媽媽個肚入面冇呢d咁閃嘅野睇, 出左世真係好喇.

今日媽媽放完產假要返工喇, 好唔開心呀! 今日仲要一早去健康院打針添, 媽媽一朝早起身就幫我準備奶粉袋, 因為唔知會攪幾耐...之後佢入房睇下我, 但我瞓左未醒, 佢摸下我面豬仔, 好唔捨得咁就走左喇...媽媽, 早d返呀!

健康院數據:

重: 5.94kg

身長:60cm