兩兄弟一起的時候

哥哥玩細佬對腳


狼仔,好似好無辜咁喎...其實細佬摸下佢啫,佢打細佬就有份


大家正正經經影番張相啦

星係算係一個乖寶寶啦

星仔整體上係一個乖BB,比狼仔好湊! 不過,有一樣野就係最唔好...餵佢食奶...
其實,一開始佢見到個奶樽,佢個樣比人個感覺係好肚餓嘅,但係次次佢都係食到20ml就會發脾氣,唔肯飲..
而家多數我都唔會再同佢糾纏落去,會用d奶奶黎整糊仔,不過佢而家都唔係好鍾意食,次次都要出動玩具佢先會勉強食完...有俾過其他野佢食..都會食..但唔係好似狼仔以前咁,表現到好鍾意.

唔係食奶時.多數都係咁可愛



佢而家好鍾意企...又會周圍攪野


喺high chair上面都可以自己玩,好good!

又有新玩具

呢套積木火車係姑姑送俾我地,好靚架...我都好鍾意玩...多謝姑姑!!

潮

呢兩件衫,係B叔送俾我架....爺爺話成三百蚊架,係三百蚊一件呀..唔係兩件呀....媽媽嚇左一跳...爸爸話媽媽唔識野,呢D係潮喎...多謝B叔,不過下次唔駛買D咁貴嘅衫俾我,我同星仔大得好快架!!

母親節

今年係我以媽媽身份過我第二個母親節喇...其實對我來講,呢一日係冇乜特別.
應該係話,由舊年開始,母親節呢一日,係咁多年以來最累嘅....
點知今年仲比上年累,因為仲多左個星仔...而母親節係星期日,即係工人姐姐放假, 又係兩個大人對兩個細路嘅日子....
呢日嘅我,同平日星期日嘅我冇分別,都係忘住餵唔多肯食奶嘅星仔飲奶,又要哄佢瞓覺,又唔可以放低佢,唔係佢又好快會醒....醒左又推佢出去行下,狼仔又要一齊去....我依然係偷唔到時間洗下面,擦下牙...拿拿淋一家四口出左街....狼仔見到麥當奴依然嚷住要食野.....一切依舊...
好彩自己阿媽黎探我地...雖然佢都係雞咁腳...坐一陣就要走(因為佢掛住爸爸,哈哈),但係我都把握時間,叫阿媽抱住星仔,自己走去食左放左兩日嘅蛋糕,飲阿媽煲嘅靈芝水(好飲),洗左個臉,擦左牙. 之後同阿媽入房,抱住星仔,傾下咁....已經係享受..
母親節,都冇同阿媽慶祝下....湊住兩個真係冇晒自己時間...
不過,明年應該會好D喇...星仔大D會好好多...
阿媽..我同你日日都係母親節架啦..要對你好唔係淨係母親節先好架..最緊要你同老豆身體健康,我就好開心喇...
兩個仔仲細,唔識同我慶祝..不過,我都好開心,因為你地兩個都好健康活潑...
上天對我真係好好...感恩感恩感恩!!

打針針

今日去樓下李醫生度打肺炎鏈球菌針,$620,仲要打多兩支. 其實星仔係可以去健康院打,唔駛錢嘅,不過要遲D先有得打,而且仲要特登去打....無謂喇...係話到時健康院會星期六日開放,不過又要坐車,又要排隊...呢D錢唔好慳喇!

兩兄弟,一個主題

赤裸上身:



食餅餅: